U gjetën të vdekur 3 nga 5 personat e përfshirë nga orteku

Viktimat janë shtetas spanjollë. Dy të tjerë ishin gjetur të gjallë, me lëndime të lehta ditën e djeshme, të shtunën dhe ishn dërguar në spital 

Foto nga arkiva: Keystone

Tre nga pesë personat që dje ishin përfshirë nga orteku në një pikë në mes të lokaliteteve Fiesch dhe Fiescheralp të Valisit, janë gjetur të vdekur, vërteton Policia Kantonale e Valisit.

Dy të tjerët ishin gjetur të gjallë, me lëndime të lehta ditën e djeshme, të shtunën dhe ishn dërguar në spital.

Policia po ashtu bën me dije se tri viktimat janë shtetas të Spanjës.

Sipas Policisë, grupi i përmendur ishte nisur në mëngjesin e të shtunës nga Konkordiahütte në drejtim të Fiescheralp, transmeton albinfo.ch. Kur ishin duke u ngjitur në zonën “Ober Tälli”, nga lartësia prej 2450 metrash qe shkëputur një ortek, i cili kishte përfshirë me vete gjithë grupin prej pesë vetash.

Pjesëtarët e një grupi tjetër po e vështronin nga larg ortekun dhe e alarmuan menjëherë Policinë Kantonale të Valisit, e cila pastaj nisi kërkimin për të gjetur viktimat.