Viti 2017, rekord: 301 raste të diskriminimit racial në Zvicër

Më së shumti raste diskriminimi kanë pësuar njerëzit “me ngjyrë”, (95 raste) të pasuar nga myslimanët dhe njerëzit nga bota  arabe (90)

Keystone

Këshillimoret në të cilat të prekurit mund të ankohen dhe të këshillohen për sulmet me bazë racizmi, në Zvicër gjatë vitit të kaluar kanë shënuar një numër rekord të rasteve. Gjithsej gjatë vitit 2017 në këto këshillimore janë regjistruar 301 raste të diskriminimit racor, që është për  një të tretën më shumë se në vitin 2016. Në të njëjtën kohë ky është numri më i madh i regjistruar ndonjëherë i rasteve të diskriminimit, shkruajnë “SonntagsZeitung” dhe “SonntagsBlick”.

Shifrat që i kanë publikuar gazetat në fjalë janë marrë nga një raport ende i papublikuar i Komisionit Federal kundër Racizmit (EKR) dhe shoqatës Humanrights.ch.

Më së shumti raste diskriminimi kanë pësuar njerëzit “me ngjyrë”, (95 raste) të pasuar nga myslimanët dhe njerëzit nga bota  arabe (90), hebrenjtë 6 etj., transmeton albinfo.ch. Ndërsa sipas nacionalitetit, më së shumti ka pasur zviceranë, 56, të pasura nga eritreanüet (24) etj.

Në shumicën e rasteve kemi të bëjmë me disavantazhet e rënda të krijuara në qasje me këto kategori ose me kërcënimet dhe sharjet. Ndërsa në 21 raste është ushtruar edhe dhunë fizike.

Megjithatë, shtimi i numrit të rasteve të diskriminimit, sipas ekspertëve mund të jetë më shumë si rezultat i përmirësimit të mundësive të regjistrimit të tyre. Por, nuk përjashtohet edhe  mundësia e rritjes reale të numrit të sulmeve, kur dihet se, sipas tyre, numri më i madh i tyre mbetet i paregjistruar.