GDP-j i bashkohet nismës për rrëzimin e Qeverisë

"Ne, si grup mendojmë që qeverisja tani nuk është duke trajtuar tema të rëndësishme që rregullojnë mirëqenien e qytetarëve”, ka thënë Sejdiu pas mbledhjes së Kryesisë së Kuvendit

Shefi i Grupit Parlamentar të Grupit Deputetëve të Pavarur, Dardan Sejdiu, ka thënë se janë të interesuar që të rrëzojnë Qeverinë e udhëhequr nga Ramush Haradinaj, por sipas tij nuk ka iniciativa konkrete për këtë çështje. Madje, ai propozimet e LDK-së të përkrahura edhe nga Vetëvendosja, i ka quajtur hipotetike.

“Kur është themeluar kjo Qeveri, kemi thënë jeni peng i vendimeve të Vuçiqit, nëse kemi qenë kundër për krijimin e Qeverisë, nuk duhet të jemi instrument i Vuçiqit në punët tona. Ne, si grup mendojmë që qeverisja tani nuk është duke trajtuar tema të rëndësishme që rregullojnë mirëqenien e qytetarëve”, ka thënë Sejdiu pas mbledhjes së Kryesisë së Kuvendit. Aty është marrë vendim që kryeministri Ramush Haradinaj të paraqitet në disa  interpelanca të hënën, më 16 prill.

“Seanca e radhës më 16 prill do të mbahet dhe do trajtohen afër 26 pika, ku janë 5 interpelanca. Jam i lumtur që interpelancën me Countur Global do ta trajtojmë në Kuvend, kjo nuk është shpërfaq në mënyrën si duhet”, ka thënë Sejdiu.