Ambasadori zviceran: Kosova duhet ta zhvillojë arsimin profesional

“Ju keni nevojë për një arsim që do të mundësojë punësimin e të rinjve që ata të mos orientohen në migrim, por që shanset e tyre t’i kërkojnë dhe krijojnë në Kosovë “, tha ambasadori  Lebet

Ministri i Arsimit Shyqiri Bytyqi, ka takuar ambasadorin e Zvicrës në Kosovë, Jean-Hubert Lebet, me të cilin biseduan për zhvillimet në fushën e arsimit dhe mundësitë e thellimit të bashkëpunimit në këtë sektor, me theks Arsimin dhe Aftësimin Profesional.

Ambasadori Jean-Hubert Lebet, tha se shteti tij do të vazhdojë që ta mbështesë zhvillimin e Kosovës, zhvillimin e arsimit, sidomos atij profesional .

“Ju keni nevojë për një arsim që do të mundësojë punësimin e të rinjve që ata të mos orientohen në migrim, por që shanset e tyre t’i kërkojnë dhe krijojnë në Kosovë “, tha ambasadori  Lebet, ndërsa  theksoi se tashmë e kemi hartuar një strategji të re, e cila do të zbatohet deri në vitin 2020.

Ndërsa Ministri Bytyqi ka falënderuar ambasadorin për mbështetjen që Zvicra ka bërë në shtetndërtimin e Kosovës, e në veçanti në reformimin e sistemit të arsimit.

“Ne kemi nevojë për përkrahjen tuaj, sidomos në ngritjen e cilësisë dhe zhvillimin e Arsimit dhe Aftësimit Profesional , të përvetësojmë modelet tuaja të zhvillimit të mësimit dual, përkatësisht ndërlidhjen e mësimit teorik dhe praktik”, tha ministri Bytyqi.

Në vazhdim, ministri Bytyqi tha se na mungon një shtrirje adekuate e shkollave profesionale në rajone, e që po e vështirëson zhvillimin e punës praktike të nxënësve.