Interpoli rikthen fletarrestet kundër politikanëve shqiptarë të Kosovës?

Funksionari serb ka thënë se "bëhet fjalë për 20 fletarreste të lëshuara nga gjykatat serbe për shqiptarë e Kosovës dhe se Serbia do të kërkojë respektimin e të drejtave ndërkombëtare"

Ministri i Punëve të Brendshme të Serbisë, Nebojsha Stefanoviq, deklaroi sot se fletarrestet e gjykatave serbe për kosovarët, të dërguara në Interpol, janë kthyer në sistemin e policisë ndërkombëtare, shkruan rtklive.com.

“Fletarrestet janë kthyer dhe janë të dukshme, përveç Ramush Haradinajt dhe Hashim Thaçit, të cilat janë në sistem, por për një kohë nuk do të jenë të dukshme”, ka thënë Stefanoviq duke iu përgjigjur pyetjes së gazetarëve në Pallatin Serbia në lidhje me qëndrimin e delegacionit të policisë serbe dhe drejtorit Vladimir Rebiq në selinë e Interpolit në Lion.

Ai ka thënë se bëhet fjalë për 20 fletarreste të lëshuara nga gjykatat serbe për shqiptarë e Kosovës dhe se Serbia do të kërkojë respektimin e të drejtave ndërkombëtare.

Ndryshe, lajmi për heqjen e Haradinajt nga lista e Interpolit ishte bërë i ditur në dhjetor 2017.