Veseli merr përkrahjen e shtetit slloven nga homologu i tij Brglez

Kryeparlamentari slloven e siguroi kryetarin Veseli për mbështetjen e plotë të Sllovenise në rrugën e integrimit euro-atlantik të Kosovës dhe në procesin për liberalizimin e vizave

Kryetari i Kuvendit të Kosovës, Kadri Veseli, gjatë vizitës së tij në Slloveni, ku po merr pjesë në takimet e SEECP-së, është pritur paraprakisht në një takim nga kryetari i Kuvendit të Sllovenisë, Milan Brglez.

Në njoftim thuhet se të dy homologët diskutuan për bashkëpunimin ndërshtetëror midis Kosovës dhe Sllovenisë në të gjitha fushat, veçanërisht në rrafshin ekonomik. Kryeparlamentari slloven e siguroi kryetarin Veseli për mbështetjen e plotë të Sllovenise në rrugën e integrimit euro-atlantik të Kosovës dhe në procesin për liberalizimin e vizave.

Po ashtu Veseli është përgëzuar për ratifikimin e marrëveshjes së demarkacionit me Malin e Zi, si një hap i madh në ecjen përpara. Në takim u diskutua edhe kërkesa e kryetarit Veseli që Kosova të kryesojë SEECP-në në periudhën kohore 2019/2020.

“Bashkëpunimi ndërparlamentar me Slloveninë, ofron mundësi të reja edhe në procesin euro-integrues”, citohet të ketë thënë Veseli.