Zvicra, e brengosur me situatën në Siri, apelon për mbizotërim të arsyes

Ministria zvicerane e mbrojtjes u bën thirrje për mbizotërim të arsyes, të gjitha palëve pjesëmarrëse në konflikt

(AP Photo/Hassan Ammar)

Sulmi i mbrëmshëm i SHBA-së dhe aleatëve tjerë perëndimorë mbi caqet siriane ka ngjallur edhe reagimin e Zvicrës.

“Zvicra po e ndjek me brengosje përshkallëzimin ushtarak” thuhet në një deklarim të Departamentit (Ministrisë) të Mbrojtjes të Qeverisë së Zvicrës. Sipas ministrisë, masat e deeskalimit duhej të kishin prioritet absolut, shrkuan SDA.ch.

Ministria zvicerane e mbrojtjes u bën thirrje për mbizotërim të arsyes, të gjitha palëve pjesëmarrëse në konflikt. Po ashtu përkujton se duhet patjetër të bëhet i mundur dërgimi i ndihmave humanitare te viktimat e luftës në Siri.

Këshilli Federal i Zvicrës është shumë i shqetësuar me situatën e re, ka thënë sot ministri i mbrojtjes, Guy Parmelin në një deklaratë të tij të dhënë radios SRF.

Ai ka theksuar se bisedimet paqësore për Sirinë që po zhvilloheshin në Gjenevë, duhet të rifillojnë, në mënyrë që gjendja në terren të shtendoset në të mirë të popullatës civile që po vuan nga pasojat e luftës. Por, për t`u arritur kjo, nevojitet vullneti i të gjithë pjesëmarrësve në konflikt.