Kërkimi për policët vazhdon të hënën

Njësitet e FSK-së kanë ndërprerë kërkimet për gjetjen e dy policive të cilët janë zhdukur pas një aksidenti që ndodhi mbrëmjen e së shtunës në magjistralen Kaçanik-Hani i Elezit.

Kërkimet do të nisin sërish të hënën në orët e para të mëngjesit. Kryeministri i Kosovës, Ramush Haradinaj, ka deklaruar se do të kërkojë ndihmën e homologut të tij maqedonas Zoran Zaev që kërkimet për dy policët e zhdukur kosovarë në lumin Lepenc të bëhen edhe në anën e territorit të shtetit fqinj, përcjell albinfo.ch.

Ai në orët e mbrëmjes ka vizituar vendin e zhdukjes së dy policëve. “Janë edhe dy kilometra lumë që janë të pakontrolluar, por do të lindë nevoja që të bëhet kërkimi edhe në Maqedoni. Do ta lus Zaevin për ndihmë në pjesën e Maqedonisë. Do t’i qëndrojmë afër kolegëve, policisë, familjeve dhe shpresoj që do të na befasoj një lajm i mirë, por po shihet një gjendje e rëndë. Të dy zyrtarët policorë kanë qenë në detyrë, kanë qenë duke u kthyer. Do të kërkojmë që atje kërkimet t’i bëjnë edhe FSK-ja”, u shpreh Haradinaj.