Gjonbalaj: Kompania e fluturimeve gënjeu për turqit

Ai u përgjigj se Ministria e Infrastrukturës është duke u marrë me rastin, por se mund të vendoset gjoba deri 1 milion euro për atë operator dhe të merren masa të tjera

“Kompania me të cilën kanë udhëtuar gjashtë shtetasit turq të deportuar nga Kosova, ka gënjyer për qëllimin e fluturimit, ngase leja është kërkuar për fluturim komercial”, ka thënë në komisionin për Mbikëqyrjen e Financave Publike, Dritan Gjonbalaj, drejtor i Autoritetit të Aviacionit Civil.

Gjobalaj, i cili u pyet nga deputeti i LDK-së, Dritan Selmanaj, për këtë çështje, u përgjigj se Ministria e Infrastrukturës është duke u marrë me rastin, por se mund të vendoset gjoba deri 1 milion euro për atë operator dhe të merren masa të tjera. “Është përgjegjësi e MI-së, si hisedar dhe kolegë që punojnë bashkë me ne. E dimë se kërkesa për fluturim është bërë në Ministrinë e Infrastrukturës si fluturim komercial, kompania ka gënjyer për qëllimin e fluturimit. Çfarë ka ndodhur në ndërkohë, është duke u hetuar. AAC-ja, për shkak se nuk është kompetencë e saj, nuk ka qenë e përfshirë direkt në këtë proces”, ka thënë ai.

Gjonbalaj theksoi se nëse miratohet fluturimi komercial, AAC-ja bën vetëm kontrollin teknik të aeroplanit, duke shtuar se asnjë pasagjer nuk mund të hyjë në aeroplan pa u kontrolluar së fundi nga Policia e Kosovës.