Donacion nga Zvicra për komunën e Skenderajt

Ka mbërritur në Skenderaj donacioni nga Zvicra, të cilin zonja Silvia Bäder i kishte dhuruar kryetarit të kësaj komune, Bekim Jashari, gjatë vizitës së tij në Zvicër. Donacioni në fjalë përfshin një kontingjent ndihmash me pajisje mjekësore, si shtretër spitalesh, karroca invalidësh, uniforma zjarrfikësish dhe pajisje të tjera.

“Në emër të qytetarëve të komunës së Skenderajt i falënderojmë të gjithë ata që kontribuuan në këtë donacion, duke përfshirë znj. Silvia Bäder, kryetarin e Komunës Pfäfer, z. Axel Zimmerman, konsullatën e Kosovës në Cyrih, konsullin Visar Rrecaj, Islam Spahiun, bashkatdhetarin Asdren Shaqiri si dhe të gjithë bashkatdhetarët tanë”, thuhet në një postim të kryetarit Jashari, shkruan albinfo.ch.

Pas kërkesës që kanë bërë njësia e zjarrfikësve për t’u pajisur me uniforma, Komuna e Skenderajt u ka dhuruar njëzet palë uniforma të tilla që erdhën si donacion nga Zvicra, të cilat do t’u shërbejnë në lehtësimin dhe kryerjen e punëve me një siguri më të madhe dhe më efikase.