Të dielën ditë zie në Kosovë, në nderim të Fadil Vokrrit

Presidenti Hashim Thaçi, ka shpallur ditën e diel ditë zie në Kosovë, në nderim të legjendës së futbollit kosovar, Fadil Vokrrit, i cili sot ndërroi jetë.

“Në shenjë respekti shtetëror dhe qytetar, me vendim të presidentit Thaçi, nesër flamujt shtetëror do të ngrihen në gjysmështizë në të gjitha objektet shtetërore të Republikës së Kosovës, brenda dhe jashtë vendit”, thuhet në njoftimin e presidencës, transmeton albinfo.ch.

Vokrri, ka vdekur sot pas sulmit që pësoi në zemër. Nënkryetari i FFK-së Agim Ademi ka thënë se varrimi i Vokrrit do të bëhet nesër në Prishtinë në orën 17:00.

Ndërkaq, zëvendëskryeministri dhe ministri i Jashtëm, Behgjet Pacolli, ka thënë se në bazë të kompetencave të tij, ka autorizuar Protokollin e shtetit që të organizojë ceremoni shtetërore të varrimit, në shenjë nderimi për legjendën e sportit.