35 mijë turistë nga Skandinavia në Shqipëri

“Sivjet janë 35 mijë turistë nga këto vende që kanë pronotuar në Shqipëri”, deklaroi Klosi

Nga qyteti i Durrësit, ministri i Turizmit dhe Mjedisit të Shqipërisë, Blendi Klosi ndërsa ishte i pranishëm në kompleksin Fafa ku 60% e të punësuarve vijnë nga shkollat e arsimit profesional, deklaroi se krahas punësimit të 300 të rinjve ka ende 100 vende të lira punë për ata që kanë përfunduar këtë arsimim.

Ministri Klosi e konsideroi investimin e kryer në këtë kompleks, një investim që ka kaluar parashikimet, pasi për herë të parë po krijohen brende, që po menaxhohen sipas tij me mjeshtëri.

Turistët norvegjezë dhe suedezë kanë pronotuar në këtë resort, tha ministri, duke shtuar se ky grup turistësh ka shtatëfishuar numrin e vizitorëve nga vendet skandinave në Shqipëri, shkruan “ATSH”.

“Sivjet janë 35 mijë turistë nga këto vende që kanë pronotuar në Shqipëri”, deklaroi Klosi, përcjell albinfo.ch.

Ai i konsideroi të rinjtë e punësuar pranë këtij kompleksi, si një përgjigje ndaj thirrjes së kryeministrit në 2014 për të zgjedhur arsimin profesional.

Ndërkaq, Klosi vuri në dukje kërkesat për punë për ata që kanë përfunduar arsimin profesional, ndaj edhe u bëri thirrje prindërve për të nxitur fëmijët e tyre të zgjedhin punësim dhe të ardhme të sigurt.