Ku mund të pini kafenë më të shtrenjtë?

Një kafe do t’ju kushtojë më shumë në Doha – 5.47 euro, ndërsa më së liri mund të gjendet në Lagos, me një çmim prej 53 centësh. Kjo është treguar nga studimi i bankës zvicerane të investimeve UBS, shkruan albinfo.ch.

Në anketë ekspertët lokalë u pyetën rreth asaj se sa do t’u kushtonte të pinin një kafe në një dyqan kafeje që më së shpeshti është vizituar. Krahasimi është bërë midis kafesë të zezë, pa qumësht dhe sheqer.

Në Doha mesatarisht 5.47 euro duhet të ndahen për vetëm një filxhan kafe. Kopenhageni është në vendin e dytë në listë, ku kjo kënaqësi kushton 4,98 euro. Në Dubai lëngu i zi duhet të paguhet 4.87 euro dhe në Cyrih – 4.26 euro. Pastaj vjen Shanghai, ku një kafe kushton 3.93 euro, Pekin – 3.78 euro, Vjenë – 3.71 euro dhe Moska – 3.67 euro. Pak më e lirë është kafja në Nju-Jork – 2.67 euro.

Çmimet më të favorshme janë në Nju-Delhi, ku kafe mund të pihet për 1.3 euro, Sao Paulo – 1.28 euro, Johanesburg – 1.27 euro, Stamboll – 1.2 euro, Kajro – 1.15 euro dhe Milano 1.14 euro. Më të favorshmet janë çmimet e kafesë në Mumbai – 90 cent, Roma – 85 cent dhe në Lisbonë – 63 cent.