Në fund të kësaj jave BE nis me tarifa kundër SHBA-së

Vendimet e Presidentit të SHBA-ve, Donad Trump për tarifat mbi importe të çelikut e aluminit kanë bërë që BE të nis aplikim të tarifave për eksportet në SHBA.

Bashkimi Evropian do të nisë aplikimin e tarifave hakmarrëse mbi eksportet në SHBA, nisur nga e premtja, transmeton REL, përcjell Albinfo.ch.

Vendimi vjen pasi presidenti i Shteteve të Bashkuara, Donald Trump, vendosi tarifa mbi importet e çelikut dhe aluminit.

Eksporteve në SHBA, të tilla si xhinset, motoçikletat dhe uiskit, do t’iu vihet taksë, tha komisionarja për tregti e Bashkimit Evropian, Cecilia Malmstrom.

Ajo tha se blloku “nuk ka dashur të jetë në këtë pozitë”.

“Vendimi i njëanshëm dhe i pajustifikuar i SHBA-së për të imponuar tarifa mbi çelikun dhe aluminin nga BE-ja do të thotë që ne nuk kemi asnjë zgjidhje tjetër”, tha Malmstrom.

Brukseli hartoi listën e produkteve në mars, kur Trump fillimisht propozoi tarifat 25 për qind mbi importet e çelikut dhe 10 për qind për aluminin, të cilat gjithashtu prekin Kanadanë, Meksikën dhe aleatë të tjerë të SHBA-së, shkruan REL, përcjell Albinfo.ch.

Trump ka thënë se tarifat janë në interes të sigurisë kombëtare në SHBA.