Filmi ‘Jurassic World’, i pari për nga përfitimet

Filmi “Jurassic World: Fallem Kingdom” e ka mbajtur vendin e parë në arkat filmike edhe në javën e dytë të shfaqjes. Sipas Boxofficemojo.com, vazhdimi i “Jurassic World” i fitoi 60 milionë dollarë brenda dy javësh.

Në këtë film bëhet fjalë për dinozaurët në ishullin Isla Nubar, ku një vullkan është gati të shpërthejë dhe t’i shfarosë dinozaurët e ngujuar në ishull. Në një gjykatë votohet që dinozaurët të lihen të zhduken nga vullkani, kështu që protagonistët e filmit, Owen dhe Claire, vendosin të shkojnë t’i shpëtojnë ata me ndihmën e disa mercenarëve, përcjell albinfo.ch.

Vendin e dytë e zë filmi i animuar me superheronj “Incredibles 2”, duke i fituar edhe 45.5 milionë dollarë nga e premtja deri të dielën. Filmi bën fjalë për familjen e superheronjve, të cilët gjatë një misioni kanë bërë një gabim të madh dhe e kanë humbur besimin e njerëzve.

Një adhurues i tyre iu ofron një mundësi për ta fituar sërish besimin e publikut, dhe ata e pranojnë këtë ofertë. Filmi i kompanisë Sony, “Sicario: Day of the Soldado”, i kaloi pritshmëritë, duke fituar rreth 19 milionë dollarë në SHBA dhe dukë zënë vendin e tretë si filmi më i shikuar në fundjavë.

Në vendin e katërt vjen filmi “Uncle Drew” me rreth 15.5 milionë dollarë të fituara dhe në vendin e pestë e gjejmë filmin “Ocean’s 8”, me rreth 8 milionë dollarë të arkëtuara brenda tri ditëve.