Pas aksidentit tragjik, të hënën ditë zie në Suharekë

Në shenjë nderimi për pesë viktimat e aksidentit tragjik që ndodhi sot në magjistralen Duhël-Suharekë, kryetari i komunës së Suharekës, Bali Muharremaj, ka shpallur të hënën ditë zie në  këtë qytet.

“Si kryetar komune në emër të të gjithë qytetarëve të Komunës tonë u shprehë ngushëllime. Natyrisht në momente të vështira, ne bashkëndjejmë me familjarët tyre në këtë pikëllim. Si kryetar komune do të marrë vendim që dita e varrimit të shpallet Ditë Zie në Komunën e Suharekës”, ka shkruar ai në “Facebook”, përcjell albinfo.ch.

Familjen Sadikaj e kanë ngushëlluar krerët e institucioneve të vendit.

“Është shumë shqetësues numri i aksidenteve në rrugët e Kosovës, prandaj kërkohet një kujdes më i madh, si prej qytetarëve, ashtu edhe prej institucioneve përgjegjëse, për uljen e rrezikut të aksidenteve të komunikacionit dhe të fataliteteve nga këto aksidente”, ka shkruar presidenti Hashim Thaçi.

Ndërsa kryeministri Ramush Haradinaj ka thënë se është shumë e dhimbshme humbja e jetës së pesë anëtarëve të një familjeje.

Kryeparlametari Kadri Veseli u ka bërë thirrje qytetarëve dhe bashkatdhetarëve për kujdes në vozitje. Veseli ka kërkuar nga Policia e Kosovës për vëmendje të shtuar për sigurinë në trafik.