Policia e Kosovës ka arrestuar gjashtë persona gjatë operacionit antidrogë “Heshtja”, të zhvilluar më 14 nëntor në rajonin e Prishtinës, në bashkëpunim me Agjencinë e Kosovës për Inteligjencë.
Sipas njoftimit zyrtar të Policisë, operacioni kishte në shënjestër një grup të organizuar të dyshuar për trafikim dhe shpërndarje të kokainës, përcjell albinfo.ch.
Ndërhyrja në terren pasoi një hetim të gjatë me masa të veçanta hetimore. Sipas Policisë, janë ngritur dyshime për një strukturë me role të përcaktuara, nga organizatorët deri te shpërndarësit e narkotikëve në rrugë.
Gjatë bastisjeve në disa lokacione janë arrestuar gjashtë të dyshuar, ndërsa një person tjetër është liruar në procedurë të rregullt.
Në operacion dhe gjatë vazhdimit të tij janë sekuestruar rreth 1.6 kilogramë kokainë, si dhe sasi të tjera të dyshuara narkotike, përfshirë marihuanë, tableta të dyshuara të ekstazisë dhe një substancë të panjohur.
Policia ka sekuestruar gjithashtu rreth 16 mijë euro para të gatshme në valuta të ndryshme dhe gjashtë vetura, përfshirë Mercedes-Maybach, Mercedes GLE, Porsche, Audi dhe VW Tiguan.
Në mesin e provave materiale janë edhe ora Rolex dhe Franck Muller, stoli të çmuara, telefona, pajisje elektronike e vëzhgimi, një armë zjarri, municion, thika dhe pajisje për peshimin e paketimin e narkotikëve.
Sipas vlerësimit policor, kokaina e sekuestruar mund të kapte vlerën e rreth 111 mijë eurove në tregun ilegal. Vlera e përgjithshme e drogës dhe aseteve të sekuestruara vlerësohet në rreth 301 mijë euro.
Me vendim të prokurorit, gjashtë të dyshuarit janë dërguar në ndalim policor për 48 orë. Hetimet dhe veprimet operative po vazhdojnë nën mbikëqyrjen dhe koordinimin e Departamentit për Krime të Rënda të Prokurorisë Themelore në Prishtinë./Albinfo.ch
