Ndërpritet greva e punëtorëve të administratës së gjykatave

Pas një jave grevë administrata e gjykatave dhe prokurorive kanë pezulluar grevën.

Është pezulluar greva e punëtorëve të administratës së gjykatave e prokurorive.

Në ditën e gjashtë, përfaqësuesit e punëtorëve nga prokuroritë e gjykatat, kanë pasur takim me krerë të KGJK-së, KPK-së si dhe ministrin e Drejtësisë, Abelard Tahiri, takim nga i cili kanë dalë me pajtim për pezullim të grevës.

Sipas kryetarit të Sindikatës së Judikaturës, Asllan Rusinovci, punëtorët kanë marrë zotimin nga KPK-ja, KGJK-ja dhe ministri Tahiri se kërkesat e tyre do të realizohen.

Kryesuesi i KGJK-së, Nehat Idrizi, nuk ka bërë të ditur nëse ka një afat për realizimin e kërkesave të punëtorëve, por ka thënë se disa prej veprimeve drejt realizimit të kërkesave, do të fillojnë pas dy javësh.

Gjithashtu, i pyetur për mundësitë për rritjen e pagave për 100%, ai ka thënë se do të veprojnë brenda mundësive.

Rreth dymijë punëtorë të administratës, kanë qenë në grevë që nga 4 korriku, me kërkesë kryesore ngritjen e pagave për 100 %.