Shqipëria ndihmon Greqinë me 100 mijë euro pas gjendjes së rëndë

Pas zjarreve që kanë kapluar Athinën, Shqipëria e ndihmon me 100 mijë euro.

Këshilli i Ministrave në Shqipëri me kërkesë dhe propozim të Kryeministrit Edi Rama, ka vendosur të ndihmojë financiarisht Greqinë, që ndodhet në një gjendje të rëndë pas zjarreve që shkaktuan dhjetëra të vdekur dhe dëme të mëdha materiale.

Qeveria ka vendosur të japë një ndihmë financiare në shumën 100 000 euro, për lehtësimin e pasojave të dëmeve të shkaktuara nga zjarret masive të korrikut.

Këto para erdhën nga programi buxhetor “Mbështetje diplomatike jashtë shtetit”, për ta përdorur si ndihmë financiare për lehtësimin e pasojave të dëmeve në Greqi.

Ministri për Europën dhe Punët e Jashtme, Ditmir Bushati ka shkruar në “Facebook”, se ‘ndihma prej 100 mijë euro e qeverisë shqiptare për Greqinë është një shumë modeste, si kontribut për lehtësimin e pasojave të dëmeve të shkaktuara nga zjarret në Athinë’.

Sipas Bushatit, Ambasada shqiptare në Athinë është në kontakt të vazhdueshëm me autoritetet greke dhe me komunitetin shqiptar.