Avdijaj largohet nga Schalke

Donis Avdijaj do të largohet nga Schalke 04, derisa pritet të transferohet jashtë Gjermanisë

Futbollisti shqiptar, Donis Avdijaj përfundimisht do të largohet nga skuadra gjermane, Schalke 04.

Avdijaj nuk është në planet e trajnerit Domenico Tedesco, ndaj duhet të gjejë një destinacion të ri.

Të mërkurën 21-vjeçari zhvilloi ndeshjen e fundit me Schalken në miqësore me SpVgg Erkenschick, ku realizoi dy herë në fitoren 5:1 të ekipit të tij, megjithatë, edhe kjo nuk ka mjaftuar që ai të qëndrojë edhe një vit në skuadrën gjermane, përcjell albinfo.ch.

Sulmuesi me Schalken ka kontratë deri në verën e vitit 2019, por menaxheri tij, Karsten Schmidt ka thënë se Avdijaj do të transferohet në një shtet tjetër, pa dhënë më shumë detaje.

Ai është huazuar dy herë nga klubi i Schalkes. Fillimisht në Austri te Sturm Graz dhe së fundi te Roda në Holandë. Edhe pse disa vite më parë konsiderohej një prej talenteve më premtues të Schalkes, me klauzolë largimi 50 milionë euro, Avdijaj nuk i përmbushi pritshmëritë te klubi gjerman, që tashmë nuk e ka më në plane.