Kosovarit i ulet dënimi për dhunë ndaj familjes

Gjykata e lartë e Cyrihut ia ka zbritur atij dënimin nga 11 në 7 vjet burg për shkaktim lëndimesh trupore dhe delikte tjera

Një shtetasi zviceran me prejardhje kosovare i është zbutur dënimi për shkaktim të lëndimeve të shumëfishta trupore, për cënim të rëndë e të paligjshëm të lirisë dhe delikte tjera, nga 11 në 7 vjet burg. Kështu ka vendosur Gjykata e Lartë e Cyrihut në një aktgjykim që e ka shpallur të premten.

Vendimi nuk është bërë ende i plotfuqishëm.

Gjykata e shkallës më të ulët e pati dënuar atë me 11 vjet burg në një gjykim që i kishte bërë në prill të vitit 2011. Këtë vendim, Gjykata e Lartë e kishte konsideruar më të lartë se duhet.

Kosovari 49 vjeçar me pasaportë zvicerane ka qenë dhe vazhdon të jetë i martuar, ndërkohë që ka edhe një familje tjetër. Për vite të tëra ai ka tiranizuar partneren me të cilën jeton dhe fëmijët e përbashkët. Ajo nuk guxonte të dilte askund pa lejen e tij dhe detyrohej të qëndronte brenda në banesë, me dritaret e mbyllura. Për të qenë më i sigurt se ajo nuk do të dilte, tashmë i dënuari kishte instaluar një kamerë në banesë.

Dhe, në rastet kur ajo kishte shkelur “rregullat” e tij, ksihte pasuar dënimi me rrahje e tortura.

Njësoj i dhunshëm, kosovari është treguar edhe ndaj fëmijëve të tij. Ai, veç tjerash, u kishte ndaluar atyre të luanin me moshatarët e tyre.

Ndërsa, në shtatorin e vitit 2009 vajza e madhe nuk kishte mundur të duronte më. Pas dajakut të radhës nga babai, ajo kishte njoftuar policinë. Nga ajo ditë terrorizuesi i familjes së tij ndodhet në burg.

Por, në vend se me praninë e tij në burg të ndjehen të çliruar, gruaja dhe fëmijët në gjykimin e të premtes kanë kërkuar me zë të lartë lirimin e tij! Kjo rrethanë dhe fakti se i dënuari kishte treguar njëfarë pendimi, ka shtyrë trupin gjykues t`ia zbusë dënimin nga 11 në 7 vjet burg.