Sllovenia sipas shembullit portugez, “Levica” do të mbështesë qeverinë pakicë

Ndryshe, "Levica" është pro daljes së Sllovenisë nga NATO dhe kundër privatizimit të Nova Ljubljanska Banka - por Sllovenia një rast të tillë e kishte premtuar përballë Komisionit Europian.

KEY

Të martën në mbrëmje partia e majtë sllovene “Levica” vendosi që të mos jetë pjesë e koalicionit – megjithatë mund të mbështesë krijimin e një qeveri pakicë, shkruan “Der Standard”. Kjo pasi partitë e qendrës dhe të majta në shtetin slloven mund të krijojnë qeverinë vetëm me mbështetje të Levicës, kjo pasi bisedimet me partinë demokristiane NSi janë mbyllur pa marrëveshje.

Shembulli portugez

Partitë e koalicionit janë ata të kryebashkiakut të Kamnik, Marjan Šarec (LMŠ), socialdemokratët SD, partia e qendrës moderne (SMC), partia e Alenka Bratushek (SAB), si dhe partia e Pensionerëve (DeSUS). Levica ka platformë tepër të ndryshme nga partitë e lartëpërmendura, megjithatë përsëri më të afërt me ata, sesa nga ndonjë qeveri e djathtë që mund të formohej nga zgjedhjet e parakohshme.

Ngjashëm ka ndodhur edhe në Portugali, ku nga 2015 ekziston një qeveri pakicë socialiste, e cila mbështetet nga dy parti komuniste.

Përndryshe, Levica është pro daljes së Sllovenisë nga NATO dhe kundër privatizimit të Nova Ljubljanska Banka – por Sllovenia një rast të tillë e kishte premtuar përballë Komisionit Europian.

Šarec ka edhe pak ditë për të krijuar një qeveri, në rast të kundër në Slloveni do ketë zgjedhje të parakohshme parlamentare. Nga zgjedhjet e fundit, partia fituese ishte SDS e Janez Jansha, por me këtë të fundit nuk dëshiron askush të koalicionojë përveç NSi.