Blakaj shpjegon arsyet e dorëheqjes, akuzon Lumezin

Prokurori i cili po hetonte, listat e falsifikuara të veteranëve, kishte zgjedhur rrjetin social “Facebook” të tregonte në lidhje me dorëheqjen e tij.

Prokurori Elez Blakaj ka zgjedhur rrjetin social Facebook,  për të shpjegur arsyet e dorëheqjet së tij. Blakaj ka pasur akuza të shumta për kryeprokurorin e Kosovës, Aleksandër Lumezi për të cilin  ka thënë se e ka pengur në punën e tij. 

“Në kulmin e këtyre hetimeve, gjatë intervistimeve, kryeprokurori i shtetit,z. Aleksander Lumezi, urgjentisht më fton në zyrën e tij dhe kërkon llogari pse e kam ftuar në intervistim z. Kadri Veselin (madje edhe si dëshmitar) për rastin e “Veteranëve”, duke u arsyetuar “SE ATA KANË IMUNITET NUK KA NEVOJË MI THIRR”, ani pse për këtë çështje ia kam bërë të qartë se Gjykata Kushtetuese në interpretimin e saj “asnjëherë, askujt, në asnjë rrethanë apo cilësi nuk i ka dhënë imunitet kur bëhet fjalë për vepra penale”…. Po ashtu, i njëjti e ka hapur edhe temën e rastit “Pronto”, i cili ka provuar të më frikësoj se nëse nuk rishikohet aktakuza e dërguar në gjykatë, do të më dërgoj në komision disiplinor… ndërsa unë i jam përgjigjur “Lirisht të parin dërgomë mua, s’e kam problem fare”, ka shkruar ai. 

Blakaj e ka pranuar për herë të parë se ka pasur kërcënime për rastin e veteranëve, por nuk i ka denoncuar, sepse nuk ka besim në sistemin aktual të drejtësisë, që e vlerëson të politizuar.