Ikja masive e rinisë, mungesë punëtorësh në Tetovë

Mungesë punëtorësh nuk shënohet vetëm në sferën e ndërtimtarisë, por edhe në hotelieri, shëndetësi dhe shumë lëmi të tjera

Ikja masive e të rinjve për një jetë më të mirë në vendet e Bashkimit Evropian, ka lënë kompanitë e ndërtimit pa punëtorë në Tetovë.

Sipas pronarëve të këtyre firmave më tragjike është fakti se kjo dukuri është në rritje e sipër. Ikja nuk u parandalua as me rritjen e pagave në këtë sektor.

“Kohëve të fundit, e sidomos këtë vitin e fundit, është shumë reale se kemi mungesë të punëtorëve dhe nga e njëjta gjë ankohen edhe gjitha firmat tjera. Kushtet më të mira që shpresojnë se do i gjejnë në perëndim sjell ikjen e njerëzve. Kjo ikje ka rritur kërkesën tonë për punëtorë, njëkohësisht kemi bë edhe rritjen e rrogave, por edhe është rritur çmimi i ndërtimit”, thotë Sali Elmazi, inxhinier arkitekt, raporton “Alsat”.

“Realisht ka mungesë në vazhdimësi sa i përket kuadrit të mirë të punëtorëve të kualifikuar dhe këtë shqetësim e kemi ngritur edhe në nivele më të larta duke iu referuar intensivisht edhe shkollave të mesme profesionale që me fanatizëm t’i rri ngremë që të kemi një zgjidhje afatgjate për këtë kuadër”, thotë Menderez Kuçi, pronar i një kompanie ndërtimi, përcjell albinfo.ch.

---