Policia jep detaje për planin policor në protestën e LVV-së

Foto ilustrim

Me qëllim të informimit të opinionit publik lidhur me protestën e paralajmëruar siç
parashihet me Ligjin mbi tubimet publike, e cila pritet të mbahet nesër
në Prishtinë, Policia e Kosovës (PK) me kohë ka bërë të gjitha përgatitjet e
nevojshme, duke hartuar planin operativ për menaxhimin e protestës, i cili ka për
qëllim mbajtjen e rendit, qetësisë dhe sigurisë publike, para, gjatë dhe pas protestës.

Me anë të një njoftimi policia ka thënë se “Vlen të potencohet se Policia e Kosovës, përmes përfaqësuesve të saj ditë më parë
ka realizuar një takim me organizatorët e kësaj proteste, për të diskutuar rreth
mbarëvajtjes së qetë të kësaj proteste, e që është qëllim primar i Policisë së
Kosovës”.

“PK-ja si institucion i zbatimit të ligjit do të ndërmarrë të gjitha veprimet konform
Kushtetutës së Kosovës, ligjeve në fuqi dhe planit të hartuar, për të garantuar rendin
dhe qetësinë publike, për mbarëvajtjen e protestës si dhe për krijimin e mundësisë
së lëvizjes së lirë të të gjithë qytetarëve, duke përfshirë masat në riorientim të trafikut
rrugor.
Policia e Kosovës mbështetur në të drejtën e qytetarëve për tubime publike, fjalën e
lirë në tubime publike, protesta e manifestime, në pajtim me Kushtetutën e
Republikës së Kosovës dhe ligjet në fuqi.
Policia e Kosovës do të jetë profesionale, në respektimin dhe zbatimin e ligjit, çdo
herë duke respektuar të drejtat e qytetarëve si dhe çdo herë duke treguar sjellje
profesionale gjatë realizimit të detyrave policore”, thuhet në njoftimin e policisë.