Sami Lushtaku ndalohet nga policia zvicerane

Ish-kryetari i Skënderajt, Sami Lushtaku, është ndaluar dje nga Policia e Zvicrës në aeroportin e Cyrihut.

Sipas raportimeve, kjo ka ndodhur pas fletarrestimeve që vazhdojnë të mbeten në fuqi nga Serbia.

Pas një kontrolli nga policia dhe procedurave të verifikimit, ish-komandanti i UÇK-së për zonën e Drenicës është liruar, përcjell albinfo.ch.

Djali i tij, Mërgimi, në një prononcim të shkurtër për Indeksonline ka treguar se kjo ka qenë thjesht një ndalesë e shkurtër.

Ai njëherësh ka treguar se Lushtaku ishte i shoqëruar nga disa miq të tij dhe ka qenë thjesht vizitë e zakonshme.

“Ende nuk kam mundur të kontaktoj me të. Po aq sa kam informacione, ka qenë një ndalesë e shkurtër, nuk ka qenë diçka shqetësuese. Ka qenë thjesht një ndalesë disaminutëshe, pastaj është liruar. Atje ka shkuar me disa miq të tij, vizita familjare”, ka treguar ai.

Ndalimin e ka konfirmuar edhe avokati i tij, Arianit Koci për “Kosovapress”. “Ka qenë një kontroll i zakonshëm, e kanë ndaluar në procedurë të verifikimit, e pas një kohe e kanë liruar. As ata nuk e kanë pyetur lidhur me fletarrestet e Serbisë, as Lushtaku nuk i ka pyetur nëse ndalimi i tij ka të bëjë me këtë çështje”, ka thënë ai.