Haradinaj shkarkon zëvendësministrin e arrestuar për ryshfet

Kryeministri i Kosovës, Ramush Haradinaj ka shkarkuar nga detyra zëvendësministrin e Zhvillimit Rajonal, Musa Cena.

I njëjti është arrestuar nga Policia të shtunën si i dyshuar për marrje të ryshfetit dhe gjykata ia ka caktuar një muaj paraburgim, përcjell albinfo.ch.

“Sot kam liruar nga detyra zëvendësministrin e Ministrisë së Zhvillimit Rajonal, Musa Cena.

Vendimi është marr mbi bazën e dyshimit se vepra është kryer gjatë mandatit aktiv të tij. Ftoj organet e rendit dhe të drejtësisë, që ta kryejnë punën me përgjegjësi në çdo situatë. Lirimi është bërë për t’i dhënë hapësirë organeve të rendit e të ligjit, që të ndjekin dhe gjykojnë paanshmërisht”, ka shkruar Haradinaj në “Facebook”.

Sipas Kodit Penal të Republikës së Kosovës, personi zyrtar i cili në mënyrë të drejtpërdrejtë apo të tërthortë pranon ryshfet, mund të dënohet deri në 12 vjet burgim.