Kosova, vend endemik për sëmundje ngjitëse

Kosova vazhdon të jetë vend endemik për sëmundje ngjitëse. Gjatë një viti, sipas të dhënave aktuale, infektohen me sëmundje ngjitëse rreth 100 mijë persona.

Sipas zyrtarëve shëndetësorë, numri i të prekurve nga sëmundjet ngjitëse, është rreth 6 mijë raste për 100 mijë banorë. Këto shifra i ka dhënë Instituti Kombëtar i Shëndetit Publik në Kosovë.

Sipas infektologut Sali Ahmeti, disa prej sëmundjeve ngjitëse, janë të reja për Kosovën.

“Këto sëmundje që kanë ardhur në Kosovë janë si rezultat i hapjes së dyerve me botën e jashtme, dhe si rrjedhojë jemi të prekur edhe nga shumë sëmundje ngjitëse e që konsiderohen si të reja, por që rrezikojnë jetën e njeriut dhe janë të kushtueshme”, ka thënë ai.

Bazuar në një studim të Organizatës Botërore të Shëndetësisë dhe institucioneve tjera, viteve të fundit, sëmundja e fruthit është rishfaqur në Evropë, ku numri i njerëzve të infektuar që nga viti 2007 është trefishuar.