Zgjedhjet lokale në Shqipëri mbahen më 30 qershor 2019

Ilustrim

Kryetari i Kuvendit, Gramoz Ruçi, ka njoftuar se presidenti Ilir Meta ka dekretuar datën për mbajtjen e zgjedhjeve lokale në Shqipëri për 30 qershor 2019.  

“Në mbështetje të nenit 92, dhe nenit 93 të Kushtetutës së Republikës së Shqipërisë, si dhe në zbatim të rregullave të parashikuara në nenin 9, paragrafi 1 dhe 2 dhe nenit 10, paragrafi 1 dhe 2 të ligjit nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar, zgjedhjet për organet e qeverisjes vendore të zhvillohen ditën e diel, më 30 qershor 2019”, thuhet në njoftim.

Presidenca ndërkohë në një njoftim për media thotë se Presidenti Meta e njohu Kryetarin Ruçi me konsultimet e zhvilluara prej tij për datën e zgjedhjeve të ardhshme lokale.

Gjithashtu, Presidenti Meta i bëri me dije Kryetarit Ruçi zhvillimin e procedurave transparente për të ftuar kandidatët, të cilët kanë paraqitur interesin për kreun e Kontrollit të Lartë të Shtetit, me qëllim përzgjedhjen e një kandidati të përshtatshëm.