Zgjedhjet në SHBA, test për Trumpin

Pas një fushate përçarëse mbi racën, emigracionin dhe çështjet e tjera kulturore, amerikanët u janë drejtuar kutive të votimit për të përcaktuar pushtetin në kongresin e SHBA-së dhe për t’i dhënë formë të ardhmes e presidencës së Donald Trump.

Me gjithë shqetësimet lidhur me ndërhyrjen e huaj, sipas monitorëve federalë, zgjedhjet e së martës për në Kongres nuk janë shoqëruar nga ndonjë incident.

Edhe pse votimet ende nuk kanë përfunduar, nuk është raportuar për ndonjë sulm kibernetik ndaj sistemit elektoral amerikan nga Rusia, apo aktorë të tjerë të huaj. Sipas njoftimeve, në të 170 mijë qendrat e votimit që ka vendi, nuk ka pasur ndërhyrje, apo ndonjë shkelje të rëndësishme.

Në Departamentin e Sigurisë Kombëtare, zyrtarët thanë se agjencitë e zbulimit nuk kishin vënë re ndonjë shenjë “fushate të koordinuar” për të prishur zgjedhjet e së martës.

Ndërkohë, ka pasur njoftime për radhë të gjata dhe mosfunksionim të makinave në disa qendra votimi në orët e para të mëngjesit, sidomos në shtetin e Xhorxhës.

Amerikanët votojnë për të gjithë anëtarët e Dhomës së Përfaqësuesve, që janë 435 ligjvënës në total, për 35 nga 100 anëtarët e Senatit, si dhe për 36 nga 50 guvernatorët e shteteve amerikane.