Çdo i 5-ti i ri me kualifikim, largohet nga Shqipëria

Një raport i UNESCO-s ka konfirmuar edhe një herë faktin shqetësues se mesatarisht 1 në 5 të rinj shqiptarë me kualifikime të larta largohen nga Shqipëria.

Shifra këto të ngjashme me shtetet afrikane, si Eritreja apo Somalia.

Studimi me titull “Emigracioni, zhvendosja dhe arsimi” e vë theksin te mundësitë që u ofrohen në radhë të parë studentëve në vendin e tyre, e më pas të rinjve që kthehen me qëllim që t’u mundësohet mbështetja dhe përshtatja me tregun e punës.

Raporti shkruan gjithashtu se Shqipëria ka shifrat më të larta sa u përket qytetarëve të saj që jetojnë jashtë vendit, ku në statistikat e 2015-ës është parë se 2.9 milionë shqiptarë jetojnë brenda vendit dhe 1.1 milion jetojnë jashtë, raportojnë media në Tiranë.

Gjithashtu nënvizohen edhe kthimet masive gjatë krizës ekonomike të disa viteve më parë, ku numri i të kthyerve u llogarit se ishte nga 150 mijë deri në 180 mijë, shumica e të cilëve emigrantë që humbën punën në vendet ku jetonin.