Tahiri iu shkruan komisarëve Hahn dhe Avramopoulos për vizat

Ministri i Drejtësisë i Kosovës, Abelard Tahiri, ka nisur një letër zyrtare tek Komisari për Politika të Fqinjësisë së Mirë dhe Negociata të Zgjerimit, Johannes Hahn dhe Komisari për Çështje të Brendshme dhe Shtetësi, Dimitris Avramopoulos, për t’i njoftuar lidhur me aprovimin e legjislacionit tepër të rëndësishëm për reformimin e sektorit të drejtësisë dhe përmbushjes së obligimeve të dala nga procesi i liberalizimit të vizave, transmeton albinfo.ch.

Përmes kësaj letre, ministri Tahiri ka theksuar se janë përmbushur të gjitha kërkesat e dala për liberalizimin e vizave dhe po ashtu që ndryshimet legjislative janë përmbushje e obligimeve të dala edhe nga Plani Vjetori i Qeverisë për vitin 2018, Programi Kombëtar për Zbatimin e MSA-së.

“Ministria e Drejtësisë është e përkushtuar të vazhdojë përmbushjen e prioriteteve qeveritare dhe të marrë masat e duhura për fuqizimin e sektorit të sundimit të ligjit  dhe po ashtu në zbatimin e këtyre ligjeve edhe në praktikë”, ka shkruar ministri Tahiri në letër.