Syla tregon se u intervistua për 18 orë nga Specialja

Ish-pjesëtari i UÇK-së për Zonën e Pashtrikut, Safet Syla, në një konferencë për media ka treguar se për dy ditë nga nëntë orë është intervistuar nga Gjykata Speciale për rolin që ka pasur në luftë.

Ai ka thënë se nuk i është dërguar ftesa si gjithë të ftuarve të tjerë dhe se intervistimi është realizuar në zyrat e EULEX-it. Hetuesit e kanë ftuar përmes telefonit dhe i kanë thënë se do të intervistohet në cilësinë e dëshmitarit, por sipas tij, nga pyetjet që i janë bërë dyshon se është duke u hetuar edhe ai, shkruan albinfo.ch

“Jam intervistuar për 18 orë nga Gjykata Speciale dhe më kanë marrë pa ftesë. Nga pyetjet e bëra kam kuptuar që më kanë intervistuar për rolin tim në luftë. Më kanë kontaktuar me telefon dhe më kanë marrë nga zyra pa pasur fare ftesë”, ka thënë Syla.

Pos tij, dje për intervistim është ftuar edhe Ramiz Shala, komandant i njësitit special të Shtabit të Përgjithshëm të UÇK-së, por ai ka refuzuar bashkëpunimin dhe avokati i tij ka njoftuar se ka humbur kontaktin me të.