Haradinaj i përgjigjet BE-së: Vendimi për taksën, është i pandryshueshëm

Kryeministri Ramush Haradinaj ka thënë se qëndrimi i Kosovës ndaj vendimit për taksën është i pandryshueshëm. Me këtë ai i është përgjigjur letrës së Përfaqësueses së Lartë e BE-së, Federica Mogherini, Komisarja për Tregti, Cecilia Malmstrom dhe Komisari Johannes Hahn, të cilët një ditë më parë kërkuan që Kosova të heqë taksën për ta larguar emrin Unmik që ka Kosova në Cefta dhe për ta vendosur emrin e Kosovës me fusnotë.

Ashtu siç kishte paralajmëruar një ditë më parë, ekzekutivi kosovar e ka refuzuar këtë kërkesë. “Nuk ka kuptim të hidhet faji për situatën në të cilën jemi. Ju jeni shumë mirë të vetëdijshëm për realitetin. Ajo për të cilën kemi nevojë tash është një nismë e re për ta ngritur dialogun në atë nivel ku çështjet si kjo e taksës janë të përfshira në një marrëveshje më të gjerë. Duke e pasur parasysh këtë, ne e kemi publikuar Draftin Gjithëpërfshirës për Marrëveshje mes Republikës së Kosovës dhe Republikës së Serbisë, i cili i është prezantuar edhe Përfaqësueses Speciale të BE-së, Nataliya Apostolova, të enjten, shkruan albinfo.ch

Qëllimi ynë është që t’i kombinojmë të gjitha gjërat për të cilat është arritur marrëveshje apo që janë shtruar mbi tavolinë në një instrument të vetëm, i cili mund ta ndërtojë bazën për një marrëveshje ligjërisht të detyrueshme mes dy shteteve”, thuhet në përgjigjen e kryeministrit Haradinaj.