Oda e Mjekëve të Kosovës kërkon rritje të pagave për mjekët

Oda e Mjekëve të Kosovës, përmes një komunikate për media, ka kërkuar rritjen e pagave për punëtorët shëndetësorë në Kosovë. 

“Ne shprehim përkrahjen tonë për realizimin e kërkesave të punonjësve shëndetësorë, të cilët përmes organizimit sindikal kanë paralajmëruar mbajtjen e grevës për realizimin e kërkesave të ligjshme që unanimisht janë prezantuar publikisht qoftë nga OMK-ja si organizatë profesionale dhe nga Federata e Sindikatave të Shëndetësisë së Kosovës, si organizatë sindikale përfaqësuese e punëtorëve shëndetësorë.  Greva është mjet legjitim i rregulluar me legjislacionin në fuqi dhe e drejtë e natyrës themelore në korpusin e të drejtave të njeriut, shkruan albinfo.ch

Ne konsiderojmë se të gjitha palët që janë aktorë socialë dhe publikë, duhet të veprojnë mbi bazën e arsyes. Kjo arsye duhet t’i ketë parasysh nevojat konkrete në sektorin e shëndetësisë, duke e trajtuar këtë sektor si një nga sektorët më vital shoqëror”, thuhet në komunikatën për media. 

Oda e Mjekëve kërkon që institucionet e vendit të ofrojnë kushte më të mira, imunitet dhe status të dinjitetshëm të profesionistëve shëndetësorë në përgjithësi, dhe të mjekëve në veçanti, si boshti kryesor profesional i sistemit shëndetësor.