Veseli, optimist për vizat

Ndryshe nga kryeministri Ramush Haradinaj, kryetari i Kuvendit të Kosovës, Kadri Veseli, ka folur për mosliberalizimin e vizave për kosovarët, duke thënë se nuk është e vërtetë se për të ka ndikuar Shefja për Politikë të Jashtme të BE-së, Federica Mogherini, shkruan albinfo.ch.

“Federica Mogherini ka kryer një punë të shkëlqyer. Nuk është mirë të krijohet përshtypja me individë – ajo ka kryer një punë të shkëlqyer në çështjen e liberalizimit të vizave dhe është një nga përkrahëset me të fuqishme për liberalizimin e vizave, siç është edhe Komisioni Evropian. Lëvizja e lirë e qytetarëve tanë ka të bëjë me vendet anëtarë të BE se sa me Komisionin ose Parlamentin Evropian, që janë tërësisht në favorin tonë. Janë gjëra që nuk mund t’i ndryshojë as Federica Mogherini”, ka thënë ai.

Ai ka thënë se liberalizimi i vizave duhet të ndodhë, sepse Kosova e meriton.

Veseli kërkon nga BE-ja t’i trajtojë barabartë Kosovën dhe Serbinë dhe përsëriti qëndrimin se nuk do të tërhiqen nga taksa 100 për qind.

Ai ka përmendur edhe letrën e presidentit Trump, duke thënë se qëndrimi unifikues nuk do të thotë cenim për territorin e Kosovës, e as krijimi i Asociacionit me kompetenca ekzekutive.