Thaçi: Letra e presidentit Trump është mesazh i SHBA-së për mbështetje

Presidenti Hashim Thaçi deklaroi se në javët dhe muajt e ardhshëm pritet të finalizohet marrëveshja përfundimtare në mes të Kosovës dhe Serbisë.

Pas takimit me liderët e Ballkanit Perëndimor në Bruksel, Thaçi tha se të gjithë aktorët ndërkombëtarë janë unikë për rëndësinë e dialogut dhe arritjen e marrëveshjes.

“Sa i përket çështjes së mundësisë për arritjen e marrëveshjes finale, gjithpërfshirëse dhe me njohje reciproke, është inkurajues fakti që të gjithë liderët e rajonit, pa dallim, mbështesin përpjekjet të Kosovës dhe të Serbisë, duke konkluduar që arritja e marrëveshjes së tillë të prodhojë paqe dhe stabilitet në rajon”.

“Nëse ka pasur hezitime para pak muajsh, sot të gjithë janë unikë për rëndësinë e dialogut dhe arritjes së marrëveshjes finale”.

Thaçi theksoi se letra e presidentit amerikan Donald Trump lidhur me arritjen e marrëveshjes Kosove-Serbi, është mesazhi i SHBA-së dhe se shfaq mbështetjen e plotë dhe unike për Kosovën dhe rajonin, shkruan kk, përcjell albinfo.ch.

“Nëse dikush ka pasur hezitime deri tani për rolin e SHBA-së, kjo dëshmon qartë me fakte se SHBA-ja është e involvuar në proces të mbështetjes së plotë për mundësinë e arritjes së marrëveshjes Kosovë-Serbi. Liderëve të Kosovës u mbetet të punojnë me përgjegjësinë më të lartë shtetërore dhe kombëtare për arritjen e një marrëveshjeje të pranueshme dhe të implementueshme”.

“Sa u përket opinioneve lidhur me letrën e Trump, nuk besoj që ka lider në Kosovë që i thotë jo asaj letre”.

Presidenti i vendit gjithashtu bëri të ditur se nuk pret të ketë takime të tjera para fillimit të vitit të ardhshëm.