Gjakovarët protestojnë kundër ardhjes së serbëve në Kishën ortodokse

Ka përfunduar e qetë protesta në Gjakovë. Pas informacioneve se nuk do të ketë ardhje të serbëve në Gjakovë, qytetarët që kanë qenë afër Kishës ortodokse janë larguar. Paraprakisht, ata kanë vendosur në dyert e Kishës ortodokse banerin me emrat e serbëve që, sipas tyre, kanë kryer krime në Gjakovë. 

Janë vendosur edhe dy pankarta të tjera me mbishkrimin: “I keni duart me gjak” dhe “Gjakova nuk harron”. 

Në anën tjetër, drejtori i Policisë për Rajonin e Gjakovës, Ahmet Hasi, ka konfirmuar për KTV-në se nuk do të ketë vizita në Kishën ortodokse në Gjakovë. Ai ka thënë se prezenca e Policisë së Kosovës në afërsi të Kishës ortodokse është për të siguruar rendin dhe qetësinë publike, përcjell, Albinfo.ch.

Protesta e familjarëve të të zhdukurve në Gjakovë është e përvitshme, sepse, sipas tyre, nën petkun e pelegrinëve fshihen të dyshuarit për krime lufte. 

Ndërsa Ministria e Punëve të Jashtme ka konfirmuar se nuk do të ketë ardhje të pelegrinëve serbë në Kosovë. 

Jetlir Zyberaj, këshilltar i ministrit të Punëve të Jashtme, Behgjet Pacolli, ka thënë se Republika e Kosovës respekton dhe garanton të drejtën e secilit qytetar për t’i ushtruar ritet fetare, por nuk do të ketë kurrfarë pelegrinazhi sot.