Kritikohet kryeministri i Kosovës për numrin e këshilltarëve  

Ish-ambasadori i Kosovës në Londër, Muhamet Hamiti, ka reaguar pas lajmit se kryeministri Ramush Haradinaj ka rritur numrin e këshilltarëve. Sa për krahasim, ka shkruar Hamiti, Qeveria e Mbretërisë së Bashkuar në kohën e kryeministrit Cameron ka pasur gjithsej 68 këshilltarë politikë, përcjell albinfo.ch.

Edhe Grupi për Studime Juridike dhe Politike ka reaguar, duke thënë se një vendim i tillë është abuzim me pushtetin. “Rritja e numrit të këshilltarëve politikë për kryeministrin në 24 dhe për zëvendëskryeministrat deri në 11, përbën minim të reformës së administratës publike dhe abuzim të pastër të buxhetit të Kosovës”, theksohet në reagim. 

Ndërsa kryeministri Ramush Haradinaj e ka arsyetuar shtimin e numrit të këshilltarëve të tij, siç ka thënë, pas angazhimeve shtesë në dialog dhe në fusha të tjera. Haradinaj ka thënë se edhe në ditët në vijim mund të ketë emërime të këshilltarëve të tjerë.