Tenderi i AQP-së, që përkrah prodhimet serbe, nxit reagime të shumta

Kryeministri Haradinaj ka reaguar për tenderin e Agjencisë  Qendrore të Prokurimit për të blerë prodhime të Serbisë, për t’i furnizuar disa institucione.

Në tender, ndër të tjerash, përmenden edhe emrat e prodhuesve serbë, si “Plazma” e “EuroKrem”, edhe pse kjo ndalohet me Ligjin për Prokurim Publik.

Kryeministri Haradinaj ka thënë se tashmë ka kërkuar nga institucionet që të gjenden personat përgjegjës.

“Jemi në pritje të qartësimit të problemit dhe identifikimit të personave përgjegjës, ndaj të cilëve menjëherë do të fillohet procedura në përputhje me ligjet në fuqi”, ka thënë Haradinaj.

Ndërkohë, Ministri i Tregtisë dhe Industrisë, Endrit Shala, e ka quajtur të papranueshëm dhe në kundërshtim me ligjin dhe ekonominë, favorizimin e disa produkteve serbe në tenderin publik të shpallur nga Agjencia Qendrore e Prokurimit.

E, lidhur me këtë tender ka reaguar edhe Ministria e Financave, e cila ka hequr përgjegjësinë e saj nga ky tender.

Kjo ministri, përmes një komunikate për media, ka thënë se MF-ja nuk ka asnjë kompetencë për të caktuar kriteret tenderuese dhe listën e mallrave dhe se cilat mallra blihen me tender dhe në cilat kushte duhet të shpallen.