Rrjeti i hoteleve “ACCOR HOTELS” planifikon të hyjë në tregun kosovar

Ministri i Diasporës dhe Investimeve Strategjike, Dardan Gashi, njofton se në takimin që ka pasur me Presidentin e kompanisë “Global Hotel Investments” AG, Roger Maibach, kompani kjo e cila në partneritet me rrjetin më të madh të hoteleve në botë “ACCOR HOTELS” ka dorëzuar aplikacionin për statusin e Investitorit Strategjik për Hotel Grand në Prishtinë.

“Accor Hotels” është një rrjet global i hoteleve dhe lider i tregut në Evropë, Amerikën Latine, Lindjen e Mesme, Afrikë dhe Azi. Ky rrjet posedon 4300 hotele në 100 shtete. Në kuadër të këtij grupi veprojnë hotelet më të njohura botërore si: Movenpick, Fairmont, Sofitel, Rixos, Pullman, Swisshotel, Grand Mercure, Novotel, Ibis etj, përcjell albinfo.ch.

Presidenti Maibach, potencoi që ky rrjet i hoteleve së shpejti do të jetë prezent edhe në Shqipëri, Mal të Zi dhe Maqedoni.

“Aplikimi i një rrjeti me reputacion si ACCOR Hotels për të hyrë në tregun e Kosovës është fat i mirë dhe gjithsesi do të kontribuojë edhe në interesimin e kompanive të tjera të këtyre përmasave për fitimin e statusit të investitorëve strategjikë në Kosovë”, thuhet në njoftim.