Arrihet marrëveshje: Ndërpritet greva në arsimin e Kosovës

Kryetari i Kuvendit të Kosovës, Kadri Veseli dhe kryeministri kosovar, Ramush Haradinaj, kanë njoftuar se kanë arritur marrëveshje me drejtuesit e SBASHK-ut për ndërprerjen e grevës në arsim.

“Urime mësimdhënës dhe nxënës të dashur! Mësimi fillon të hënën”, ka shkruar Veseli në Facebook, ku ka publikuar edhe një fotografi së bashku me kryetarin e SBASHK-ut dhe kryeministrin Haradinaj, përcjell albinfo.ch.

Më vonë, edhe kryeministri kosovar, Haradinaj, shkroi në Facebook se në takim me kryetarin e Kuvendit, Kadri Veseli dhe përfaqësuesit e SBASHK-ut përfunduan marrëveshjen me sindikatat dhe u dakorduan që mësimi të fillojë të hënën.

“Dialogu ynë do të vazhdojë në funksion të përmirësimit të sistemit arsimor në vend. Urime nxënës!”, ka shkruar kryeministri. Greva në arsim ka filluar tri javë më parë, me kërkesën për rritje të koficientit për 30 për qind.