Një person humb jetën pas goditjes së dy kuajve në A3

(KEYSTONE/Laurent Gillieron)

Një automobilist ka humbur jetën, natën nga e shtuna në të diel pasi goditi dy kuaj që ishin në autostradë A3 në Wollerau. Kafshët gjithashtu kanë ngordhur, shkruajnë mediat zvicerane, përcjell Albinfo.ch.

Një vozitës 53-vjeçar ka humbur jetën mëngjesin e së dielës rreth orës 04.00, pasi ka goditur dy kuaj që kanë qenë duke lëvizur lirshëm në autostradën A3, në Wollerau (SZ). Vozitësi dhe dy kafshët nuk i kanë mbijetuar aksidentit.

Pavarësisht përpjekjeve për të ringjallur vozitësin, ai ka ndërruar jetë në vendin e ngjarjes, raporton Policia Kantonale e Cyrihut, përcjell Albinfo.ch. Në bashkëpunim me zyrën e prokurorit publik në Limmattal-Albis, policia ka filluar hetimet për të përcaktuar shkaqet e sakta të aksidentit dhe arsyen për praninë e kuajve në autostradë.
Autostrada A3 ka qenë e mbyllur deri në orën 08.30, në relacionin midis Wollerau dhe Richterswil (ZH). Trafiku u devijua nga policia kantonale e Schwyzit.