Gjermania përkrah Shqipërinë në rrugën e saj drejt BE-së

Kreu i Kuvendit të Shqipërisë, Gramoz Ruçi ,ka marrë garancinë e ministrit gjerman për Çështjet me BE-në, Michael Roth, sa i takon vendimmarrjes së ministrave të Jashtëm të Bashkimit Evropian për hapjen e negociatave me Shqipërinë në muajin qershor të këtij viti.

Gjatë vizitës zyrtare në Gjermani, kryetari i Kuvendit, Gramoz Ruçi dhe kryetari i Grupit Parlamentar të PS-së, Taulant Balla, u takuan edhe me ministrin e Shtetit për Çështje të BE-së, Michael Roth.

Gjatë këtij takimi, Ruçi e vuri theksin te mbështetja e qeverisë gjermane dhe kancelares Merkel në procesin e vendimmarrjes së Vendimit të Këshillit Europian për rekomandimin për çeljen e negociatave në qershor 2019, përcjell albinfo.ch.

Nga ana e tij, ministri Roth vlerësoi arritjet e reformës në drejtësi, si një reformë e suksesshme dhe vlerësoi partneritetin e ngushtë midis të dy vendeve në funksion të procesit të integrimit evropian te Shqipërisë. “Qëndrimi i politikës së jashtme gjermane vazhdon të mbetet mbështetës për Shqipërinë në rrugëtimin e saj drejt integrimit në BE”, tha Roth, duke vënë theksin te realizimi i reformave.