Protestohet edhe në Drenas për rastin e 16-vjeçares

Kundër rastit të fundit të dhunimit të një të miture në Drenas është protestuar në këtë komunë. Protesta në Drenas është mbajtur me moton “Pro mësimit, jo përdhunimit”. 

Fillimisht, protestuesit, shumica prej të cilëve janë nxënës të gjimnazit “Gjergj Kastrioti Skënderbeu”, kanë qëndruar para këtij gjimnazi, në shkollën ku ka qenë i angazhuar mësimdhënësi që dyshohet se e kishte dhunuar fillimisht të miturën. 

Më pas, marshi ka vazhduar drejt stacionit policor në Drenas. Policia sërish është gjuajtur me vezë, për shkak se pjesëtarët e saj nuk janë tërhequr dy hapa mbrapa në shenjë distancimi nga veprimi i kolegut të tyre. 

Në këtë protestë është lënduar edhe një aktiviste. Kjo ishte protesta e dytë kundër rastit të abuzimit seksual të të miturës në Drenas, e cila dyshohet se u abuzua nga mësimdhënësi i saj, e më pas edhe nga zyrtari policor, tek i cili e paraqiti rastin.