Shpend Ahmeti padit VV-në për shpifje, e fton Albin Kurtin në debat publik

Kryetari i Komunës së Prishtinës, Shpend Ahmeti, ka dorëzuar padi për shpifje ndaj Lëvizjes Vetëvendosje lidhur me furnizimin me qumësht nëpër shkollat e Prishtinës, raportojnë mediat vendase.

Ahmeti tha se për furnizimin me qumësht në shkollat e Prishtinës të gjitha procedurat kanë qenë të hapura dhe se është çmimi më i ulët që paguan ndonjë komunë në Kosovë.

“Këtë padi e kam ushtruar sepse ata e kanë shpallur veten edhe gjykatës edhe pse kanë qenë tërë kohën pjesë e furnizimit me qumësht sepse të gjitha këto furnizime të cilat ata i kanë potencuar kanë ndodhur gjatë kohës kur unë kam qenë në VV. Për ta me rëndësi janë sulmet e vazhdueshme”, tha ai.

Ahmeti ka thënë se të gjitha këto shpifje organizohen nga kryetari i VV-së, Albin Kurti që sipas tij, e gjuan gurin dhe e fsheh dorën, përcjell albinfo.ch.

Ai ka ftuar Albin Kurtin që të ballafaqohen në një debat televiziv, kudo që dëshiron ai, tek cili moderatorë të dëshiron ai.

“Kemi kërkuar dëmshpërblim për shpifje, nuk e kemi caktuar vlerën, le të vendos gjykata”, tha ai.