Marrëveshje për të drejtat e qytetarëve të Zvicrës dhe Britanisë

Zvicra dhe Britania kanë formalizuar një marrëveshje dypalëshe që mbron të drejtat ekzistuese të qytetarëve të tyre, pasi Britania të largohet nga Bashkimi Evropian.

Marrëveshja u nënshkrua të hënën në Bernë nga sekretari i shtetit në Ministrinë zvicerane të Drejtësisë, Mario Gattiker dhe sekretari parlamentar britanik në Departamentin për daljen nga Bashkimi Evropian, Christopher Heaton-Harris.

Ai garanton të drejtat e fituara nga lëvizja e lirë e njerëzve midis Zvicrës dhe BE-së, e cila hyri në fuqi më 2002. Marrëveshja gjithashtu rregullon kërkesat e sigurimeve shoqërore dhe njohjen e kualifikimeve profesionale, tha Sekretariati Shtetëror për Migracionin

Qeveria e Zvicrës miratoi marrëveshjen dhjetorin e kaluar. Pritet që të zbatohet nga fillimi i vitit 2021 pas një periudhe tranzicioni që fillon përkohësisht që nga 30 marsi.

Qeveria zvicerane thotë se dëshiron të “sigurojë që të drejtat dhe detyrimet ekzistuese reciproke në marrëdhëniet e saj me Mbretërinë e Bashkuar do të vazhdojnë të zbatohen sa më shumë që të jetë e mundur”. Si pjesë e politikës së saj ajo ka në plan të zgjerojë të drejtat në fusha të caktuara.

Si industria inxhinierike e Zvicrës edhe komuniteti hulumtues është i shqetësuar se mund të pësojnë pengesa të rëndësishme nëse nuk mund të arrihet asnjë marrëveshje me Britaninë në epokën e pas Brexit, përcjell albinfo.ch

Zvicra dhe Britania tashmë kanë nënshkruar marrëveshje për transportin rrugor, transportin ajror, si dhe tregtinë dhe sigurimin.

Më parë këtë muaj, qeveria zvicerane vendosi të caktojë një kuotë maksimale vjetore prej 3,500 për emigrantët britanikë që dëshirojnë të punojnë në Zvicër.