Në Zvicër kthehen më pak se 10% të refugjatëve të dëbuar

Nga ana tjetër, sa u përket të dëbuarve në vendet e Dublinit, në Gjermani kthehen sërish 30 deri 40 për qind të tyre

Po u krahasua gjendja me Gjermaninë, vetëm një numër i vogël i azilkërkuesve të dëbuar kthehen sërish në Zvicër. Sipas ministres federale të drejtësisë, Karin Keller-Sutter, kuota e kthimit te të ashtuquajturat “raste të Dublinit” është më e ulët se 10 për qind, shkruan sda.ch.

Në dy vitet e fundit, në Zvicër janë kthyer sërish 328 persona që më parë ishin dëbuar nga Zvicra, ka pohuar të hëenën ministrja Sutter në seancën e pyetjeve në Dhomën Nacionale të Parlamentit të Zvicrës, transmeton albinfo.ch. Ajo i është përgjigjur kështu pyetjes së deputetes nga SVP, Barbara Steinemann. Sipas saj, gjatë po kësaj periudhe kohore Zvicra ka dëbuar 4057 azilkërkues në shtete të ndryshme, anëtare të Marrëveshjes së Dublinit.

Nga ana tjetër në Gjermani kthehen në vend një e treta deri gjysma e të gjithë refugjatëve të dëbuar. Ndërkaq, sa u përket të dëbuarve në vendet e Dublinit, në Gjermani kthehen sërish 30 deri 40 për qind të tyre.

---