Zvicra mbyll hapësirën e saj ajrore për Boeing 737 Max 8

Në hapësirën ajrore të Zvicrës zhvillohen gjithsej 2 deri në 3 fluturime të aeroplanëve Boeing 737 MAX në muaj, fluturime që operohen nga kompani të jashtme

Pas aksidentit të rëndë ajror që ndodhi dy ditë më parë, Agjencia Evropiane për Sigurinë e Fluturimeve ka mbyllur hapësirën ajrore të gjithë kontinentit për të gjithë aeroplanët Boeing 737 Max 8.

Ky bllokim i hapësirës ajrore hyn në fuqi në orën 19.00, njofton srf.ch.

Në Zvicër nuk është licencuar asnjë aeroplan i këtij tipi, bën të ditur Zyra Federale për Komunikacion Ajror Civil (Bazl), transmeton albinfo.ch. Sipas saj, në hapësirën ajrore të Zvicrës zhvillohen gjithsej 2 deri në 3 fluturime të aeroplanëve Boeing 737 MAX në muaj, fluturime që operohen nga kompani të jashtme.

Megjithatë, edhe Zvicra ka vendosur të mbyllë hapësirën e saj ajrore për këtë tip fluturakesh, ka thënë përgjegjësi për komuiniukim në Bazl, Urs Holderegger për “20 Minuten”.

Para kësaj, kanë qenë një numër i madh vendesh të botës që kanë shpallur ndalesën për fluturim të aeroplanit problematik në hapësirën e tyre ajrore. Në mesin e këtyre vendeve janë: Gjermania, Britania e Madhe, Franca, Austria, Holanda etj.

Po ashtu edhe në Australi dhe në Aeroportin e Singapurit, njërin ndër më të mëdhenjtë në botë, hë për hë është ndaluar aterrimi dhe ngritja e aeroplanit 737 Max 8.

Kompania e fluturimeve me kosto të ulët “Norwegian”, njëra ndër kompanitë që kanë më së shumti në shfryxtëzim aeroplanët e përmendur, gjithashtu ka vendosur të heqë dorë nga Boeing 737 Max.

---