Policia mbyll 22 lokale të masazhit në Prishtinë 

Foto ilustrim

22 lokale të masazhit janë mbyllur nga Policia e Kosovës, në aksionin “Masazha 2019”, i organizuar në bashkëpunim me Komunën e Prishtinës, Inspektoratin e Ministrisë së Tregtisë dhe Industrisë dhe Administratën Tatimore të Kosovës. 

Sipas policisë, aksioni u realizua me inspektimin e 48 lokale, të cilat veprimtarinë e tyre e kanë masazhin, ndërsa vetëm gjatë këtij vitit janë arrestuar 18 persona. 

Riza Murati, nga Drejtoria Kundër Trafikimit me Qenie Njerëzore, ka bërë të ditur se gjatë kontrollit kanë hasur në pesë punëtore të mitura.

“Të inspektuara 48 lokale, prej tyre 22 të mbyllura për shkak të parregullsive. Janë hasur 211 punëtorë, prej tyre, 180 femra, 31 meshkuj. 20 shtetas të huaj, 11 të Shqipërisë, 6 Tajlandës, ka pasur të Italisë, Rumanisë, Gjermanisë. Janë hasur edhe 5 punëtore të gjinisë femërore, nën moshën 18-vjeçare. Kemi pasur dy raste në dy lokacione ku janë arrestuar 9 persona të dyshuar për veprën penale për prostitucion. Në total në vitin 2019, në sallone masazhi janë 18 persona në tri raste të ndryshme”, theksoi ai.